BYZANTII seu BYZANTEI

BYZANTII, seu BYZANTEI

nummi Graecorum Imperatorum a Byzantio, quô nomine primitus urbs Constantinopolis vocata fuerat, dicti, apud Baldricum Dolensem Histor. Hierosolym. l. 1. Guil. Malmesburiensem de Gestis Regum Angl. l. 4. Guntherum Histor. Constantinopolit. c. 15. alios. Primus vocem usurpâsse Carolo du Fresne videtur Iohannes VIII. Pontif. Ep. 133. Et nostram, inquiens, iram habebit et mille Byzanteos palatio nostro componet: a quo inter Latinos appellatio ista hisce nummis mansit. Aurei illi erant, unde Byzantei aurei apud Tudebodum et Visanti aurei, in Capitulari Radelchisi Principis Benevent. auri librae Byzanteae, in Charta Athanasii Archiepiscopi Neapolitani circa A. C. 937. etc. Solidi Constantinopolit. interdum nuncupantur in veterib. Tabb. apud Ughellum passim: Imo eorum, quorum erant Imperatorum, vel quorum imagines praeferebant, nominibus persaepe a Scriptoribus insigniti occurrunt dictique Romanati, Constantinati, Michalati, Manuelatt et contractâ voce Manlat, a Romano Diogene, Constantino Duca, Michaele Duca, Manuele Comneno etc. Ad Saracenicas dein et Turcicas monetas Byzantiorum nomen transiit, quos ad Graecanicorum nummorum discrimen, Saracenatos Byzantios appellant plerique Scriptorum mediae aetatis; item Saracenatos nude, et Saracenos: Cuiusmodi fuêre Sultanorum Iconiensium, apud Guil. Tyrium l. 12. c. 25. De Byzantiis Massamutinis, vide infra ubi de vode Marabotinus. Neque vero aureis tantum nummis id vocabuli mansit, sed et argenteis, praesertim in Cyprio Lusignanorum Regno, attributum legitur: qui Byzantii albi dicuntur in Constitutionibus Odonis L. A. in Cypro A. C. 1248. c. 4. Byzantit de plata, i. e. argentei et Byzantii bonae platae, in Charta Bermundi de S. Martino Maioricensi A. C. 1232. quâ Nunoni Sancii vendit aliquot alquerias pro mille et quingentis Byzantiis bonae platae. Unde Car. du Fresne colligit, eiusmodi Byzantios monetam fuisse Maurorum in Hispania Principum. Idem hinc Heraldicae Artis studiosos docet, cur in armorum insignibus globuli aurei et argentei Byzantiorum appellatione donentur, cum, qui alterius coloris sunt, Tortelli dicantur; quia videl. nummos aureos et argenteos exhibent, quos Bezans vulgo Galli ipsi appellant, vide eum in Glossar. item Dissertat. 20. ad Ioinvillam et Dissertat. de inferioris aevi Numismatibus p. 56.